Општина Македонски Брод со нов изглед

Центарот за развој на Југозападниот плански регион, во рамките на регионалниот проект „Подобрена енергетска ефикасност во ЈЗПР и искористување на ОИЕ“, ги заврши активностите за енергетска ефикасност на Општинското Собрание на Општина Македонски Брод.

Изминатиот период, во овој објект, се изврши целосна реконструкција и енергетска ефикасност на внатрешните ѕидови со поставување на камена волна, изолација на таваните и подовите. Во рамки на општинската зграда, се реконструираше и Општинското Собрание на самата општина со енергетски ефикасни мерки во подовите, таваните и ѕидовите како и нова електрична инсталација. Вкупната вредност на работите изнесува 7 милиони денари, од кои 6 милиони се обезбедени преку Бирото за регионален развој, додека 1 милион од буџетот на Општина Македонски Брод.

Во рамки на истиот проект, активности се одвиваат и во другите општини и тоа во Општина Пласница – реконструкција на фасада и кров на ОУ „Јунус Емре“ во с.Лисичани, Општина Кичево – инсталација на 6 фотоволтаични системи во 6 јавни објекти од по 20 kW, Општина Струга – реконструкција на ПОУ „Бафтјар Бануши“ и ОУ „Св.Климент Охридски“, а во следниот период се очекува да почне и реализација на активноста за реконструкција на ОУ „Саид Најдени“ во Општина Дебар.