Центарот за развој на Југозападниот плански регион, во рамките на проектот за доопремување на Центарот за физикална терапија во болницата Св. Еразмо во Охрид, деновиве изврши монтажа и стави во функција нова опрема, со што значајно е подигнато нивото на услугите на оваа специјализирана болничка установа. Вкупната инвестиција е околу 2,466 милиони денари, а средствата се обезбедени во рамките на инвестициските проекти на Центарот за развој на Југозападниот плански регион, како и од сопствено учество на болницата.
Имено, во Центарот за физикална терапија монтирани се две кади за електротерапија на цело тело на пациентите, единица за криотерапија и хидрауличен лифт за базен. Новата опрема ќе ги подобри услугите за пациентите кои имат потреба од хидротерапија, односно хидромасажа, како и олеснување на пристапот до базенот за пациентите кои имаат поголеми потешкотии во движењето. Единицата за криотерапија ќе придонесе за намалување на мускулно-скелетните проблеми, а ќе може да се користи и за аналгетски цели, намалување на воспалението и забавување на локалните метаболички процеси.
Проектот за доопремување на центарот за физикална терапија во болницата Св. Еразмо е финансиран од страна на Швајцарската агенција за развој и соработка, Министерство за локална самоуправа, а кофинансиран од страна на самата установа. Во текот на минатата и оваа година течат поголем број зафати за подобрување на условите и во болницата за кардиолошки заболувања Свети Стефан во Охрид и болницата за Нефрологија во Струга. Преку проектите на Центарот за развој и со сопственото учество на трите установи во нивната реконструкцијата и модернизацијата ќе бидат вложени околу 52 милиони денари.
No comment yet, add your voice below!